SIGARU LOLON IDA

Loron-loron,

ita tau-ahi, halo suar boot

husi sigaru lolon ida

Neineik-neineik

hamosu ahi-suar metan,

kosar lu’ut hamutuk,

sunu lakan iha isin laran be klean.

Ita klamar haneruk ahi ne’e,

ba loron naruk.

Besik liu ba pulamao,

oli-metan husi sigaru suar

falun-metin,

dada iis badak-naruk,

sura loron no kalan.

Besik liu ba fuan,

oli-metan husi sigaru suar,

troka ona ran moos ho ran metan,

halolo tuir isin-lolon

klamar namlele.

Besik liu ba iis,

hu’u loron-loron,

sigaru suar oli-metan nian,

hafalun ema sira be haleu ita,

labarik, feto no Inan-aman.

Ita nu’udar fuma-nain,

hela hamutuk no haleu hela,

husi sira be inosente,

horut sigaru suar no oli-metan,

husi ita loron ba loron,

Sira! La hetene buat ida.

Ah! Moris loloos husi

fumador nian mak,

laos deit dada sigaru,

halo suar.

Maibe, konkorda ona

hodi hemu oli-metan,

tama ba isin-lolon be sala-laek!

Ah! Belun fumador sira!

Hela iha infernu ka lalehan,

depende deit,

ba ita-nia liman kaer sigaru masu ida,

no ibun fuma sigaru lolon ida.

Lalikan hapara sigaru,

Se ita sei hakarak haterus,

Ita-nia an rasik no,

ema inosente sira ne’ebe haleu hela ita,

iha ita-nia moris tomak.

© Mausou Ablai-anan

Bebora, Dili. 14.02.2018

Photo source: google picture

Note: Poema ne'e aprezenta ona iha atividade hapara sigaru iha loron 14.02.2018 ne'ebe oragniza husi Sr. Sancho Fernandes 'STOP SMOKING'