ITA NU’UDAR SURAT-TAHAN METAN IDA

Bainhira ita monu ona iha rai-ku’ak,

susar laran moris nian, mai…

hakbesik ita!

Iha ne’e kedas,

ita-nia moris nakfilak ona,

ba surat-tahan metan ida,

folin le’et, iha ema-balun nia matan-laran.

Uniku ita-mesak deit,

mak kumprende sentimentu klean ne’e.

Bainhira ita-nia laran ne’e iha kanek,

nakukun laran moris nian, mai…

hakbesik ita!

Iha ne’e kedas,

ita-nia moris nakfilak ona,

ba surat tahan metan ida,

fahe tiha ita, husi kor arkires moris nian.

Uniku ita-mesak deit,

mak kumprende sentimentu klean ne’e.

Oh… Moris!

Ita labele hatun ulun hakruuk demais,

ida ne’e hola-parte ba dutrina moris nian.

Tan loron ohin la’os hotu ona,

loron aban sei naruk,

loron horiseik hanorin ita!

Katak…,

sai karik surat-tahan metan ida

la’os ikus ona ba moris ida ne’e.

Sei iha maun-alin laran-moos sira

mai hakerek netik!

Katak…,

sai karik surat-tahan metan ida

la’os ikus ona ba moris ida ne’e,

sei iha familia laran-diak sira

mai hekerek netik,

Katak…,

sai karik surat-tahan metan ida,

la’os ikus ona ba moris ida ne’e,

tan ita sei repete hela sirkulu tolu

moris nian: horiseik, ohin, no loron-aban…

Dalaruma ita la sente iha dalan naruk

moris nian ida ne’e…

hatu’ur tiha ona ita…,

nu’udar surat-tahan metan ida,

ne’ebe hakerek nanis, ho lapizeira kor-mutin,

Inan-Aman nian!

© Mausou Ablai-anan

Shibuya, Japaun 31.01.2018

Photo source: google picture [Black and White Hands]

----------------------------------

Nota: Poema ne’e insipradu husi konversa kiik ida ho artista famozu afganistaun nian ho naran Zabih Mahdi. Ninia obra muzika mak utiliza ba Sountrack filme ho titulu “A Letter to President”. Belun Zabih Mahdi mak introduz hau ba Poeta Famozu Afganistaun nian, Maulana Rumi. Poema nu’udar apresiasaun ba ami-rua ninia hasoru malu hanesan artista husi Timor-Leste no Afganistaun!