‘LOHU DAME NIAN’
- Mausou Ablai-anan
- Oct 18, 2017
- 1 min read
Karik buatruma naksalak
iha ai-laran tuan ne’eba,
husik nia maran dekor tiha ho ai-tahan sira
lalika halo’ot ailuruk ne’e hodi hamosu ahi-boot
ahi, lalar ulun, halo fuan metan
matan domin la’ek ona
moris haketak malu
rai no fatuk lasimu ona ruin naklekar sira
bee no mahowen lasimu ona ran sira
Karik buatruma naksalak
iha ai-laran tuan ne’eba,
haloos tiha ho ai-fafulu nia lolon sira
homan tiha fafulu ne’e sai hadak hodi tu’ur hamutuk
lo’ok bua no malus hodi tetu lia-inan
hamaus oan-timor hanoin malirin
iha ai-laran tuan ne’eba, fini barak mak hakarak moris
husik fini ne’e fó-fuan, nu’udar ai-han ba manufuik sira
husik fini ne’e fó-funan, nu’udar ai-han ba banin sira
fini, manufuik no banin…
sira lahatene buat ida
Diak liu haloot tiha lia-naksalak sira
Iha lohu dame nian…..
© Mausou Ablai-anan
Dili, 04.03.2014
Photo source: google image
留言