Hodi Mehi Koko Hau Nia Dalan

Dadersan rai hun mutin, manu-fu’ik sira hakfu’ik ho lian halerik ,

Sinal hatudun, moris loke tan pázina ida

Lulun biti no somasu, foti ain husik hela moris fatin,

Fila kaba’as haree ba kotuk laran susar

Basa husik hela Inan- Aman, ba loron, fulan no tinan barak

Tan de’it hakarak buka matenek i muda moris

Eiihhh…….eeh…….

Inan-Aman husik ho promesa lian la’ek, falun metin sira fuan kmo’ok

Sira hakarak haree loron ruma

Ita manan, funu moris nian

Lia dadolin Inan-Aman nian, ita hulan, maske laharee maibe todan

Iha sidade, hahu’u aprende no senti

Moris komesa lahanesan, tan dook ona hosi Inan-Aman

Luta mesak ba moris, loron no kalan………

Hahan lato’o,

Domin menus hosi Inan –Aman, tan dook ona iha sira sorin

Susar atu toba, hamlaha atu hola, laiha osan,

Moris karun liu tan….

Iha dalan………..

Hanoin barak no halerik ho lian esperansa,

Bainhira mak futuru ne’e to’o loos mai…………………

Iha tempu mesak, kadernu, lapizeira haruka

mensazen furak ida liu hosi mehi…. dehan

Kalma……….kalma………..kalma……….

Ohin Ó tanis, loron ruma O sei hamnasa

Ohin Ó triste, loron ruma Ó sei kontente

Ohin Ó hamlaha, loron ruma Ó sei bosu

Ohin O nia futuru malahuk, loron ruma O nia futuru sei sai nabilan

O nia matan we’en sei maran

O nia halerik sei troka ho hamnasa

O nia susar sei sai kma’an

O…..O duni mak nasaun nia isin no klamar………...

O…….mak funu na’in moris nian………………………..

© Mausou Ablai-anan

Dili, 20.03.2011

Photo source: Mausou Ablai-anan